өтімділік

(Проходимость)

1) жергілікті жердің өтімділігі – әскерлердің жылжуы үшін оның қолайлылық дәрежесі. Жолдан тыс жергілікті жер Ө. дәрежесі бойынша, әдетте, өтімді, қиын өтімді және өтуге болмайтын болып бөлінеді. Өтімді жергілікті жер дөңгелекті және шынжыр табанды машиналардың бөгетсіз жылжуын қамтамасыз етеді, тек қана жекелеген тұстарды айналып өту немесе нығайту (өткелдер жабдықтау) қажет болады. Қиын өтімді жерлер машиналардың тек қана жеке бағыттар бойынша аз жылдамдықпен жылжуына мүмкіндік береді. Ол жерде маневр мүмкіндігі шектелген. Өтуге болмайтын жерлер жолдардан және лек жолдарынан тыс ұрыстық және көліктік машиналардың барлық түрлерінің жылжуына мүмкіндік бермейді. Ө. орындалатын жауынгерлік міндет, ұрыстық және көліктік машиналардың тактикалық-техникалық көрсеткіштері ескеріліп бағаланады. Жергілікті жердің Ө-гі негізгі күштерді шоғырландыру бағытын таңдауға және операцияда (ұрыста) әскерлерді қолдану тәртібіне ықпал ете алады.

2) машиналар Ө-гі – ұрыстық және көліктік машиналардың түрлі жол жағдайларында және жолсызда ілгерілеу мүмкіндігі. Ол машиналардың түрлі табиғи бөгеттерден (су бөгеттері, күрт еңістер, орлар және т.б.) өтуі бойынша тактикалық-техникалық сипаттамаларымен анықталады. Ол машина қозғалтқышының меншікті қуатына, меншікті қысымына, жүріс бөлігінің құрылысына және басқа да тактикалық-техникалық мәліметтеріне, сонымен қатар жүргізушілердің дәрежесі мен тәжірибесіне байланысты болады. Машиналардың Ө. дәрежесі оларды құрастыру кезінде арналу мақсатына орай беріледі. Ө-ті жоғарылату мақсатында арнайы дөңгелекті әскери автокөліктер, әдетте, толық өтпелі болып жасалады. Доңғалақты және шынжыр табанды сауытты танкті техниканың едәуір бөлігі жүзбелі, саңылаусыз болып және сүзбелі-желдеткіш құрылғылармен жабдықталады. Бұл оларға су бөгеттерінен, сонымен қатар радиоактивті залалданған аймақтардан өтуге мүмкіндік береді.